السارق المجهول كاملة بقلم غادة سعيد

الفلوس فين مين الي سرقني!!!!!!

الحقوا يا ولاد ابوكم اتسرق .....

_ في ايه يا بابا ايه الي حصل....

= الدولاب ده كان فيه ٥٠٠٠ جنيه شايلهم للزمن من شهر كنت لسه عاددهم كويس  وحاططهم هنا بين الهدوم بفتح ملقيتهمش

_ ازاي يابابا الكلام ده مين هيكون سرقنا...

= هيكون مين يعني هي فيه غيرها امكم سرقتني وراحت لأهلها تصرف عليهم الفلوس...

_ لا يا بابا ماما متعملش كده...

= انا هوريها لما تجيلي بس محدش فيكم يجيب سيرة خالص ليها بموضوع الفلوس....

ازاي بابا يشك في ماما انها ممكن تسرقه دي عمرها ما عملت حاجه غلط وست بتصلي وعارفه ربنا ...

طيب ليه ما شكش فيا انا واخويا لحظه مهو ممكن يكون حد فينا برضو سرق ...

او ممكن حد من الجيران الي بيدخلوا عندنا ....

انا لازم اسأله ليه قال انها ماما ...

انا فريدة وعندي ١٧ سنه في ثانوية عامة....

وعندي اخ اكبر مني اسمه فادي بيدرس فالجامعه لكن هو ملموم علي شوية صحاب مش كويسيين بوظوا اخلاقه وخلوه واحد تاني

عشان كده هو الصح كان يشك في فادي مش ماما...

انا هدخل دلوقتي اسأله ايه سبب انه بيتهم ماما بحاجه زي دي

بس بابا طبعه صعب جدا مش بيسمع من حد لكن جايز لما اتكلم معاه يفهمني حاجه...

دخلت عليه الاوضه...

_ بابا ممكن اتكلم معاك...

= تعالي يا فريدة ادخلي..

_ هو انت ليه شكيت ان ماما هي ال خدت الفلوس مش جايز حد تاني ...

= محدش عارف اني محوش فلوس هنا غيري انا وامك وهي قبل متسافر لأهلها طلبت مني فلوس وانا موافقتش اديها راحت سرقاني....

= لا يا بابا ماما مستحيل تعمل كده ...

بكرة هتيجي وهنعرف ونفتح الدولاب بتاعها الي قفلاه ع طول بالمفتاح ده ومحدش عارف الي جواه ساعتها هتتأكدي ان كلامي صح ....

عدا اليوم وتاني يوم الصبح لقينا باب الشقه بيتفتح بدري وماما جت جريت عليها عشان احكيلها الي حصل بس بابا سبقني وخدها جرها من ايديها

_ طلعي الفلوس الي خدتيها يا هدي

= فلوس!!!! فلوس ايه...

_ بقولك ايه متستهبليش الفلوس الي خدتيها من الدولاب...

= والله ماخدت حاجه ...

_ كده طيب هاتي مفتاح الدولاب الي انتي علي طول قفلاه لما نفتح ونشوف ايه جواه...

= لا مش هجيبه دا دولابي وفيه حاجتي

_ والله لو ما جبتي المفتاح دلوقتي هقتلك يا هدي

= معلش يا ماما اديلوا المفتاح بابا الشيطان مسيطر عليه دلوقتي....

_ خد المفتاح حسبي الله ونعم الوكيل فيك...

كلنا واقفيين مستنيين نشوف ايه الي جوة الدولاب ..

وبابا فتحه ولقي فيه حاجات خليتنا كلنا واقفيين في ذهول....
يتبع

السارق المجهول
الجزء الأول
بقلم/ غاده سعيد

#التائهه
#معرض_الكتاب
#دار_بداية

السارق المجهول
الجزءالثاني
بقلم/غادة سعيد

بابا خد المفتاح وفتح الدولاب ولقي جواه هدوم ماما ولما شالهم لقي ١٥٠٠ جنيه وسلسلة دهب....

_ سيب الفلوس دي انا بقالي سنين بحوش فيهم من مصروف البيت ودي سلسله امي جايبهالي شيلاها للزمن مرضتش اوريهالك عشان متبعهاش ....

_ انتي هتكذبي عليا دي بقيت الفلوس الي سرقتيهم وعقابا ليكي هاخدهم وهاخد السلسلة ابيعها وآخد فلوسها عشان متسرقيش مني حاجه تاني......

_ والله العظيم ما سرقت منك حاجه دي فلوسي  هات الفلوس وسلسلة امي ....

_ والله ما هتاخديهم خلاص ....

_ حسبي الله ونعم الوكيل فيك والله ما مسمحاك عالفلوس دي وعشان اتهمتني زور .....

_ احمدي ربنا اني مبلغتش عنك.....

ماما اعدت تعيط وصعبت عليا وانا متأكده انها مظلومه وهفضل ادور عشان اعرف مين الي سرق الفلوس....

ماما دخلت اوضتها وانا دخلت وراها ....

_معلش ياماما متزعليش ...

_ والله يافريدة ما سرقت حاجه ...

_ انا متأكده انك مظلومه وعشان كده هثبت انك مظلومه بنفسي....

_ ازاي يابنتي ...

_ سيبيلي الموضوع دا انا....

كتابات ل ghada saeed

نزلت تشتري شويه حاجات للبيت وانا تحت لقيت اخويا واقف مع اصحابه الي ملموم عليهم جمب عمارة كده قربت عشان اشوفهم بيعملوا ايه....

بس صدمتي كانت كبيرة لما لقيتهم بيشربوا سجاير واخويا بيشرب معاهم....

جريت واخويا شافني ونده عليا....

_ انتي ايه الي جابك هنا

= نازلة اشتري شوية حاجات للبيت وشفتك انت واصحابك وانت بتشرب سجاير من ورانا...

_ فريدة اوعي تقولي لبابا وماما...

= مش هقولهم بس بشرط انك تعترف انك الي سرقت الفلوس....

_ اعترف ايه انتي اتجننتي انا مسرقتش حاجه والله...

=انت فاكرني عبيطه امال الفلوس دي بتجبها منين والسجاير الي بتشربها بتدفع فلوسها منين وانت اصلا الفلوس الي بابا بيديهالك يادوب بتكفي مواصلات للجامعه...

_ السجاير دي اصحابي بيعزموا عليا بيها انا عمري ماشتريت....

=طيب ليه مدافعتش عن ماما خالص...

_ انا بصراحه مقتنع ب كلام بابا اصل مين الي هيكون خد الفلوس غيرها

= ماشي يا فادي عالعموم انا هعرف مين خد الفلوس وساعتها هروح اقول ل بابا....

اشتريت الحاجه وانا طالعه بيها قابلت طنط فاطمة جارتنا واعدت تسألني....

_ ايه يافريدة صوت الزعيق الي كان عندكم ده...

= مفيش يا طنط كنا بنتكلم مع بعض وشدينا مع بعض شوية...

_ دنا كنت سمعاكم بتزعقوا جامد ....

= مفيش حاجه ياطنط شوية مشاكل بسيطه فالبيت...

_ طيب يا حبيبتي عاوزه حاجه ابقي دوري علي الحاجه كويس يا فريدة مع ماما....

= استني ياطنط انتي عرفتي منين اننا ضايع مننا حاجه...!

_ اصل انا عرفت من........

يتبع...

#التائهه
#معرض_الكتاب
#دار_بداية

السارق المجهول
الجزء الثالث
بقلم/غادة سعيد

_ اصل انا عرفت من صوتكم العالي..... والله يا بنتي انا متصنتش بس صوتكم انتم اللي وصلني لحد عندي

بصلتلها وهزيت راسي ومشيت وانا الفار بيلعب في عبي وخصوصا ان جارتنا دي كانت عندنا قبل ما ماما تسافر بيوم وكانت قاعده في الاوضه بتاعه ماما لوحدها وماما بتعملها الشاي ولما دخلت عليها ارتبكت جدااا

رحت لماما وقلتلها على شكوكي وقالتلي:
لا يا بنتي طنط فاطمه دي ست طيبه وبتعمل خير وانا عرفاها كويس

وهي ارتبكت لما دخلتي عليها علشان كانت مصوره اخوكي وهو بشرب سجاير ومكنتش عوزاكي تعرفي الخيبه

_ لا ما انا عرفت
= عرفتي ايه؟؟؟

كتابات ل ghada saeed

_ عرفت انه بيشرب سجاير لسه شيفاه حالا
=بصي بقى يا فريده انا مكنتش عاوزه اقولك بس انا شاكه ان فادي هو اللي خد الفلوس

_ والله وانا يا ماما بس ده لو صحيح بابا هيقتله
= ربنا يستر يا بنتي ويعدي الموضوع ده على خير بس انا لازم اعرف ابوكي اني بريئه

_ حتعملي ايه يا ماما
=استني هتشوفي بنفسك

ولقيت ماما فتحت الدولاب بتاعها وجابت صوره وراحت لبابا
وقالتله

_ بص بقى انا المفروض معشش معاك ولا دقيقه بعد ما اتهمتني اني حراميه بس ده دليل اني مش انا اللي خت الفلوس

دي صوره قديمه لأمي في فرحنا اهي وهي لابسه السلسله اللي انت اتهمتني بسببها ومقلتلكش عليها لاني خايفه تخدها مني زي ما اخدت دهبي كله

= يعني انتم هتجننوني... امال الفلوس راحت فين يبقي نشك بقى في فادي وفريده

_ هو انت مصمم تجبلنا مصيبه ليه انا عيالي ما يعملوش كده

= امال مين.... يبقي مافيش غير صاحباتك اللي بيجوا البيت كل يوم والتاني

بقولك ايه قدامك اسبوع تكوني عرفتي مين اللي خد الفلوس وترجعهالي

بابا قال الكلام ده وساب البيت ومشي وماما قعدت تعيط

وانا كنت حاسه بيها لان بابا ديما مشيلها زنب كل حاجه هي المسؤوله عن أي وكل مشكله بتحصل انا كمان دخلت اوضتي وقعدت اعيط وصممت اعرف مين اللي اخد الفلوس بالضبط

وقررت اراقب تصرفات فادي لحد ما اعرف الحقيقه

بس في نفس اليوم حصل حاجه غريبه سمعت بابا بعد ما رجع بيتكلم في التليفون وبيقول لواحد يعني انا لو جبتله صوره هيقولي من اللي سرقني؟؟

قلقت اوي بعد ما سمعت المكالمه ومكنتش فاهمه حاجه
وبعد يومين عرفت.....

لقيت بابا بيزعق مع ماما ويقولها انه النهارده هيعرف

مين اللي سرقه ولما ماما سألته قالها ان واحد صاحبه قاله على راجل مبروك هيفتحله المندل وهيقوله مين اللي سرقه

ماما قالتله حرام عليك ده شغل دجالين ونصب وهيشككنا في نفسنا وفي عيالنا

بس بابا قالها وانتي خايفه من ايه انا نازل اقابله دلوقتي ولما ارجع لينا كلام تاني

قعدت انا وماما مستنين بابا يرجع ولما جه كانت مفاجأه كبيره....
يتبع

#التائهه
#معرض_الكتاب
#دار_بداية

السارق المجهول
الجزء الرابع والاخير
بقلم/غادة سعيد

جه فتح الباب ودخل وهو ساكت خالص ومش بينطق ولا كلمه ....

_ هاا يابابا الراجل قالك ايه...

_ قالي.... الراجل خد صور امك واخوكي  وقالي محدش فالصور دي الي سرق ...

وانا دلوقتي محتار الفلوس هتكون راحت فين بس يا فريدة...

_ ما يمكن انت حطتها في مكان تاني....

_ لا يا بنتي الفلوس مش بغير مكانها عمري ما حطتها في مكان غير ده....

_ طيب ماتدور كويس يابابا....

_ قلبت الدولاب كله مفيهوش حاجه...

= طيب لو سمحت هات سلسلة امي وفلوسي انا مخدتش منك فلوس والراجل الي كنت بتقابله قالك كده.....

_ لا وانا ايه يضمنلي ان الراجل ده كلامه صح ما جايز يكون بيخرف...

= هو عشان طلعني بريئه يبقي بيخرف...

_ ايوة وعالعموم انا بعت السلسلة وخدت الفلوس عشان افك بيهم زنقتي انا محتاج فلوس....

= منك لله مش مسمحاك ليوم الدين هتلاقيك مفيش فلوس ضايعه منك وعملت كل ده عشان تاخد فلوسي....

_ ياستي الي بيكذب بقي ربنا ينتقم منه.....

كتابات ل ghada saeed

دخلت الاوضه انا وماما....

ماما كانت بتعيط عشان زعلانه علي سلسلة مامتها اخر ذكري ليها  اتباعت خلاص ومش هتشوفها تاني... اعدت اواسيها .....

وفضلنا عالحال دا اسبوع وفيوم كنا فالاوضه وبابا بيفتح الدولاب لقي فلوس وقعت وهو بيجيب هدومه ...

كلنا بقينا في ذهول اعد يعدهم لقاهم ٤٥٠٠ جنيه نفس فلوسه بس ناقصيين ٥٠٠ جنيه....

كلنا استغربنا لكن بابا فضل يقول....

_ انا كده خلاص اتأكدت ان امكم خدت الفلوس ورجعتها عشان ارجعلها السلسلة بس خلاص لازم تتحمل نتيجه الي هي عملته ....
وتحمد ربنا اني مفضحتهاش وسط الناس....

_ منك لله روح يا شيخ مش مسمحاك لا دنيا ولا أخره...

= خلاص بقي اقفلوا الموضوع ده مش عاوزين فضايح....

الموضوع اتقفل واتنسي خلاص بس ماما مش عارفه تسامح بابا علي الي عمله ده.....

بعد مرور سنتين.....

_ اصحي يا بابا يلا قوم عشان صلاة الجمعه.....

بابا مبيردش......

اصحي يابابا ماما جهزت الفطار قوم افطر وانزل عشان تصلي.....

يا ماما الحقي بابا مش بيرد ....

_ في ايه يا فريدة ابوكي ماله....

اصحي يا عمااد.....

انزل بسرعه يا فادي هات دكتور ابوك مبينطقش....

نزل فادي يجري يجيب الدكتور ولما جه كانت الصدمه....

_ البقاء لله ياجماعه شدوا حيلكم....

كتابات ل ghada saeed

كانت صدمه علينا كلنا خصوصا انه مات فجأه مكنش عيان او بيشتكي من اي مرض .....

ماما ياعيني اتصدمت وانا وفادي مكناش مصدقين ...

لكن بعد ٥ سنين من وفاته ماما كانت شايله في قلبها منه...

كنا قاعدين نتكلم انا وهي وجت سيرة بابا الله يرحمه...

فاكرة يا ماما بابا لما كان......

_ بس يا فريدة مش عايزه اسمع حاجه منه لله مش مسمحاه بعد ما اتهمني اني سرقت فلوس وانا مسرقتش

_ ياه ياماما انتي لسه فاكرة....

_ وعمري ماهنسي وهفضل ادعي عليه انه اتهمني وهو اكيد الي كان مخبيها عشان ياخد فلوسي ربنا ينتقم منه...

_بس ياماما متدعيش عليه بابا مش كداب حرام عليكي بابا حد كان سارق منه الفلوس...

_ وانتي ايه الي عرفك يا فريدة!!!!!

_ انا الي كنت سرقاهم يا ماما انا اسفه اصحابي كانوا بيعايروني فالمدرسه عشان مكنش بيبقي معايا فلوس اشتري حاجات زيهم وكنت ببقي مخنوقه ومكنتش عارفه اصرف فلوس زيهم ولا اشتري الي بيشترووه

خدتهم ولما لقيته اتهمك رجعتهم تاني بس ناقصيين الفلوس الي اتصرفت...

انا اسفه يا ماما اني عملت كده انا كنت صغيرة وطايشه واصحابي وصلوني اني اسرق عشان ابقي زيهم....

سامحي بابا ياماما هو مظلوم زيك بظبط سامحيه واوعي تدعي عليه دا بين ايدين ربنا....

لقيت ماما دموعها نزلت وحضنتني....

_ مسمحاه يابنتي ومسمحاكي انتي كمان❤

النهاية

#التائهه
#معرض_الكتاب
#دار_بداية





وضع القراءة :
حجم الخط
+
16
-
تباعد السطور
+
2
-