لم يخبرني احد الجزء الرابع

كان عدي كام شهر علي جوازي وأخواته بدؤا يسألوا ليه مفيش حمل لحد دلوقت ولحد لما أخته قالتلي شكلك عندك تكيس في المبايض اصلك تخينة من عند البطن 
وكلام كتير كان بيوجع ولما كنت برد كان بيقول اننا مش محترمة ودي أخته الكبيرة وانا عمري ما غلطت بس كنت برد علي اي كلام المهم خدت قرار اني ماروحش تاني عندهم بس مكنش بيكمل مامته كانت بتتعب وكان من الواجب اروح عندها اخدمهم عشان اخواته بيروحوا معاها المستشفي ولما كنت بقوله عاوزة اروح يقولي روحي اقعدي لوحدك في البيت ومتروحيش بيت مامتك المفروض تقعدي في بيتك كنت بعمل كده أهون اني اقعد في بيتهم وفضل الحال كده لحد لما ربنا كرمني وبقيت حامل واخته شككت اني حامل وقالت اني بكدب وخداني لدكتور العيلة بتاعهم وأكد اني حامل وعشان يدفعلي مصاريف الحمل والولادة كان شرط اكمل عند الدكتور ده وبعدين كانت أخته تروح معايا عند الدكتور واد ايه كان نفسي امي الي تيجي معايا كنت في تفاصيل كتير مش قادرة انساها كان عاوز يبعدني عن اهلي وكأن مرات الزوج لازم تكون خدامة أو تبعد عن أهلها لمجرد أنها دخلت عيلة جديدة وربنا اراد إني أولد وكانت أمي معايا لوحدها وطبعا بابا مجاش عشان الخلافات الي حصلت اول الجواز المهم طبعا قبل ما أولد هو قرر أنه يسبب شقتي الي اتجوزنا فيها ونروح نأجر شقة جنب والدته وانا وافقت علي الاقل مش هبات عندهم واتبهدل هو يروح براحته هناك ولما ولدت روحت شقتي وأخواته كلهم جم عندي وطبعا امي كانت معايا بس اسود ايام حياتي كنت يعيشها أنا اسفة. اني بحكيلكم كده بس انا مش عاوزة حد يتجوز حد أقل منه أو يتنازل أو يضحي دي نتيجة التنازلات والحب والاحترام شئ واحد مش منفصل ولازم معاهم تقدير غير كده مبقاش مناسب المهم عدي اسبوع ومامته قالت السبوع علي أهل العروسة مش علي العريس والي حصل أنه والدتي جابت السبوع فعلا كله عشان تفرحني بس يا فرحة ماتمت محدش حضر السبوع غير اخواته وماماته ومامتي بس ومفيش ولا اصحاب ولا اختي ولا ابويا وطبعا ده كله عشان مايزعلش وامي روحت وانا قعدت اعيط لوحدي بعد كده لما مشيوا اد ايه في ناس كده وشخصيات أنانية كده وانا لو اتكلمت أو اعترضت البيت هيتخرب وانا مش هبوز البيت الي امي تعبت معايا كتير فيه وفضل الحال كده لحد ما أمه تعبت التعب الأخير قبل وفاته بأسابيع كانت ملازمة الرعاية وكلهم حواليها بنتي كانت ٣ شهور  بترضع صناعي سبتها لماما روحت اقعد عندهم اخدمهم  وفضلت معاهم ٣ اسابيع من قلة الذوق وعدم التقدير وفي الاخر حماتي ماتت وللاسف مزعلتش عليها ولاعيطت عليها مبعرفش أمثل الحزن زي اي حد بيجامل وعدي اول يوم عزا وامي جابتلي بنتي بعد ٣ اسابيع مش بشوفها وبعد العزا لقيتهم بيتخانقوا معايا أنا وسلفتي ويقولوا انتي مزعلتيش علي آمنا انتي مكنتيش بتحبيها وانا مردتش لحد لما أخته الكبيرة بدأت تغلط فينا أنا ومرات اخو زوجي (سلفتي)وقررت افتح الشقة واخد بنتي وامشي روحت قعدت في بيتي وهو قالي انتي مش قادرة تستحملي اخواتي انتي ست مش كويسة طبعا أنا فضلت كاتمة كل ده جوايا وساكنة وعدي شهر والتاني وبعدين اخواته فضلوا يعملوا مشاكل كتير لحد لما قلتله حسبي الله ونعم الوكيل فيك وفيهم مش مسامحة اي حد شوهني أو آذاني نفسيا والنتيجة كانت ضرب بالجزمة وضرب بالسلك لما جسمي علم من الضرب 
وطبعا بعدها قعد يتأسف ويعتذر واني استفزيته بس انا سكت وعديت بس منستش الضرب والإهانة وخلاص قطعت علاقتي بأهله ودي احسن حاجة كان لازم اعملها من زمان بس برضه مسلمتش من اخواته وتسخينهم ليه عليا كانوا ومازالوا لحد دلوقتي المهم حياتي بقت صراعات معاه كل شوية خناقة وتسبب البيت بالشهر والتاني وارجع يتصالح لحد ما قررت انفصل خلاص وصلت مرحلة اني مش قادرة اكمل وطلبت الطلاق رفض 
روحت رفعت قضية خلع وفضلت في القضية دي حوالي ٦شهور بعد ما سبت بيتي ورجعت بيت اهلي وانا رافعة القضية لقيت مشاكل من نوع تاني امي كانت بتعاملني معاملة غريبة وكانت بتتعمد تهيني واختي توأمي كانت في معاملتها وحشة الوحيد الي كان واقف جنبي ابويا
لحد ما جيه اليوم ده ..... اليوم الي غير حساباتي كلها

الجزء الرابع
لم يخبرني أحد



وضع القراءة :
حجم الخط
+
16
-
تباعد السطور
+
2
-