قصة اطفال عن الكورونا

_ صباح الخير يا احمد اصحي ياحبيبي النهارده اول يوم فالمدرسه ....
= صباح النور ياماما

_ يلا يا احمد قوم اغسل وشك وسنانك عشان تفطر وتلبس عشان الباص قرب يجي

= حاضر ياماما...

دخل احمد التواليت غسل وشه واسنانه واتوضي عشان يصلي
وأكل فطاره كله...

ومامته قالتله وهو بيلبس هدومه...

_ أوعي يا احمد تنسي الكلام الي قولتهولك امبارح اوعي تنسي تعقم ايدك كل شويه واوعي تقلع الفيس شيلد ولا تستخدم حاجة حد من اصحابك ولا تشرب من ازازه حد

= خلاص يا ماما بقي فهمت حضرتك قولتيلي الكلام ده كتير

نزل احمد وركب الباص وراح المدرسه وهو فالبريك كان بيلعب مع اصحابه لقي واحده جاية تكلمه
_ ازيك يااحمد تعالي العب معايا

= انتي مين.  وعرفتي اسمي ازاي...
_ انا اسمي كرونا وعاوزه العب معاك بس مش هينفع نلعب مع بعض غير لما تقلع الفيس شيلد ايه الكحول الي في ايدك ده ارميه عشان نعرف نلعب كويس....

رمي احمد الكحول وقلع الفيس شيلد ونسي كل الكلام الي مامته قالتله عليه وقعد يلعب مع اصحابه وفجأه صاحبته الي اسمها كرونا اختفت...

روح البيت وكان تعبان جدا وسخن ومش قادر يتكلم

مامته قالتله

_ مالك يا احمد وفين الفيس شيلد بتاعك هو ده الي انا قولتهولك ونصحتك تعمله .....

وخدته ونزلت المستشفي وهو فالطريق كان بيفكر هيحصل في ايه فالمستشفي وهياخد حقنه وهو بيخاف من الحقن فجأه نام علي كتف مامته

وصحي علي صوت مامته بتصحيه....

_ اصحي يااحمد اصحي ياحبيبي النهاردة اول يوم فالمدرسه

صحي احمد بسرعه وعرف انه كان بيحلم وكل الي حصل دا مش حقيقي

_مالك يااحمد هو انت خايف كده ليه....

_ انا حلمت حلم وحش ياماما مش عاوز افتكر واحكيه بس انا عايزك تعرفي ان انا عمري ما هخالف كلامك تاني وهعمل ب كل نصايحك ليا

بقلم غادة سعيد




وضع القراءة :
حجم الخط
+
16
-
تباعد السطور
+
2
-