بيت العيلة الجزء الرابع

بيت العيلة
الجزء الرابع
بقلم/غادة سعيد

سمعتها بتكلم واحد وتقوله....

_ لا ياحسام متقلقش انا هنزلك النهارده
انت كمان وحشتني اوي وهموت واقابلك....

اتصدمت لما عرفت انها علي علاقه ب واحد مع انهم عيله محافظه دا لو اخوها عرف ممكن يقتلها...

دخلت عليها ارتبكت...

_ طيب يا سهام هكلمك بعدين وقفلت...

_ سهام برضو ولا حسام الي نازله تقابليه انا سمعت كل حاجه وتخيلي بقي لو مامتك واخواتك عرفوا....

_ انتي واقفه تتصنتي عليا ....

_ سميها زي ماتسميها الي زيكم مش عاوز غير كده....

اسمعي يابت انتي لو معاملتنيش كويس انا واخوات جوزك كل الكلام ده هيوصل ل امك واخواتك عشان تبقي عارفه بس اتقي شري احسنلك ....

_ نعم ياختي !!!!
ايه رأيك بقي ان ماما عارفه الكلام دا كله....

_ ليه هي مامتك عارفه ان بنتها بتقابل شاب من وراهم......

لقيتها فجأه صوتها بدأ يعلي....

_ ياماااااما يا مااااامااا

_ في ايه يا صباح صوتك جايب اخر البيت....

_ الزباله مرات ابنك بتهددني وتقولي هفضحك واقولهم اني سمعتك بتكلمي واحد...

والظاهر كده حماتي عارفه الموضوع كله...

لقيت حماتي بتبصلي وعينيها كلها نار....

_ عاوزه تسوقي سمعه بنتي وتحكي لاخواتها والله لاربيكي من اول وجديد....

ومحستش بنفسي غير وانا تحت ايديها هي وبنتها نازليين فيا ضرب والرجاله كلهم نزلوا....

ولقيت عصام داخل يجري....

_ في ايه ياماما ايه الي حصل......

لقيتها بدأت تعيط وتتمسكن...

_ يرضيك ياعصام يابني مراتك تتهم اختك في شرفها ...

بتتبلي عليها انها بتكلم واحد ودخلت علي تليفونها لقيتها بتكلم سهام صاحبتها....

_ والله ياعصام كدابة اختك بتكلم واحد وبتقابله....

_ اخرسي انتي خالص كمان بتقولي علي امي كدابة....

اتفضلي اطلعي فوق وحسابنا في بيتنا ....

خدت بعضي وطلعت فوق وطلعت غلطانه اني كنت فاكرة اني ممكن امسك عليها ذله دول ناس بجحه مبيعرفوش العيب....

طلعت فوق عالبيت وانا جسمي مكسر واعدت افكر فالطلاق انا خلاص تعبت مكملتش اسبوع جواز وفي قرف وضرب واهانه غير بابا الي مات وسابني....

وانا قاعده افكر لقيت تليفوني بيرن ماما بتتصل...

_ ايه ياهبة ياحبيبتي مبتكلمنيش ليه...

_ عامله ايه ياماما غصب عني ياحبيبتي

_ انا مش كويسه ياهبة خالص انا حاسه اني هيجرالي حاجه من بعد ابوكي طمنيني عنك يابنتي وعن جوزك

_ الحمد لله ياماما انا كويسه وكله تمام متشغليش نفسك بيا اهم حاجه تخلي بالك من نفسك ومن صحتك...

مقدرتش احكيلها عن اي حاجه عشان هي فيها الي مكفيها....

فجأه الباب اتفتح ولقيت عصام داخل وهو عينه بتطق شرار....شكل امه مسخناه جامد

_ انتي ازاي تتبلي علي اختي انا اختي متربيه احسن تربيه....

_ انا مش بتبلي علي حد انا قولت الي سمعته بوداني وبكرة هتعرف ان كلامي صح

_ طيب من هنا ورايح ملكيش دعوة ب صباح ولا ماما تاني وتكلميهم ب احترام ....

_ حاضر ان شاء الله ...

عاوز حاجه انا داخله انام...

كتابات ل ghada saeed

_ تنامي ايه في غدا بيتعمل تحت انزلي ساعدي سلايفك....

نزلت وانا حاطه الجزمة في بؤي اساعد سلايفي و لقيت حماتي واخت جوزي قاعدين بيبصوا لبعض ويضحكوا ويوشوشوا بعض...

ولقيت اخت جوزي جايه تقولي في وداني

_ ابعدي عني احسنلك انتي مش قدي...وضحكت ضحكه صفرا...

بس علي مين انا هفضل وراها لحد ما اثبت ان كلامي صح والله ماهسيبها....

جهزت معاهم الغدا والرجاله نزلوا الشارع وكالعاده صباح خدت التليفون ودخلت البلكونه تكلم حبيب القلب

وتتفق معاه انها هتقابله بكرة اخر النهار ....

سمعتهم وانا بكنس الصاله ....

فجأه جاتلي فكرة ....

وقولت لحماتي

_انا هطلع ارتاح فوق شوية واكلم امي اتطمن عليها عشان تعبانه

_ طيب ياختي ساعه بالظبط وتنزلي عشان العشا ومتخلنيش اجيبك من فوق

_ حاضر...

طلعت فوق كلمت وفاء اختي حكيتلها علي كل حاجه من ساعه ماجيت والقرف الي شايفاه

_ شوفتي ياهبه قعدت احزرك من بيت العيله مصدقتنيش...

طب انتي ناويه علي ايه دلوقتي

_ وفاء انا عوزاكي تساعديني

_ اساعدك ازاي

_ انا لازم اردلها الضرب الي ضربتهوني هي وامها وانا اصلا مكنتش هفضحها والله انا كنت بس عاوزاها تبعد عني...

انا عوزاكي تشتري خط جديد وتبعتي منه رساله بكره ل عصام ان اخته نازله تقابل واحد عشان ينزل وراها ويشوف بنفسه....

_ ماشي هنزل دلوقتي اجيب الخط

وبالفعل وفاء نزلت جابت الخط وطمنتني انه معاها ومستنيه مني اشاره اني اخليها تبعت ل عصام الرساله....

تاني يوم طبعا نزلنا وحضرنا الفطار والست هانم شغاله مكالمات وبعد الغدا لقيتها بتلبس وتحط ميك اب كامل اتأكدت انها خلاص علي وشك النزول رحت رنيت ل وفاء وفي ثانيه كانت الرساله علي تليفون عصام

فتح التليفون ولقيته ارتبك جدا

_ مالك يا عصام

_ مفيش حاجه تعبان شوية....

راحت صباح نزلت وهو خرج وراها علي طول....

طلعت فوق كلمت وفاء وسألتها عملت ايه فالخط...

_ بعت الرساله ورميته علي طول وكسرته.....

انا بقي قاعده مستنيه الي هيحصل يا ترا عصام هيلحق يمشي ورا صباح....

عدا ساعه والتانيه...

وفجأه لقيت الباب بيتفتح

نزلت اشوف لقيت كارثه....

يتبع
الخامس والاخير من هنا











وضع القراءة :
حجم الخط
+
16
-
تباعد السطور
+
2
-