بيت العيله الجزء الثالث

بيت العيلة
الجزء الثالث
بقلم / غادة سعيد

_ الحقيني ياهبة

_ في ايه ياوفاء مالك

_ بصحي بابا عشان يقوم يفطر مبيردش عليا الحقيني وماما نزلت تشتري حاجات ومعهاش تليفون...
انا مش عارفه اتصرف بابا قاطع النفس....

_ انا جيالك حالا....

فجأه باب الشقه اتفتح وانا منهارة لقيت حماتي داخله وشافتني ....

_ في ايه يابت مالك

_ بابا مبيردش علي وفاء وقاطع النفس انا لازم اروحلها حالا...

_ انتي اتخبلتي عاوزه تنزلي يوم صباحيتك الجيران يقولو ايه علينا

_ جيران ايه وزفت ايه بقولك بابا قاطع النفس....

_ كلم انت مراتك ياعصام وشوف بقي الناس هتقول عليك ايه لما يشوفوا مراتك نازله....

_ ماما عندها حق يا هبة الناس هنا مش بتسكت....

_ هو انتوا بتقولوا ايه مش عاوزني انزل اشوف بابا طب انا بقي هنزل بالعافيه

جريت عالباب لقيتها خرجت من برة وقفلت بالمفتاح ...

وانا وعصام جوة...

_ افتحلي الباب ابوس ايدك اختي منهارة ....

فضلت اتحايل عليه ساعه لحد ما وافق قبل ما انزل اتصلت ب اختي...

كتابات ل ghada saeed

_ وفاء انتي فين انا جيالك اهو

_ خلاص ياهبة متتعبيش نفسك ملوش لزوم مجيك

_ ليه بابا بقي كويس

_ بابا تعيشي انتي

_ انتي بتهزري صح انتي بتقولي ايه...

فجأه التليفون وقع من ايدي واعدت اصوط وادعي عليهم كلهم انهم مخلونيش انزل ....

عصام نزل عند مامته يبلغها بالخبر وانا نزلت وراه عشان اروح بيت بابا سمعته من عالباب بيقول ل امه ان بابا مات...

_ خلاص نروح كلنا احنا برضو ناس بتفهم فالاصول...

جم كلهم علي بيت بابا وماما واختي كانوا منهارين وانا كنت حاسه كأني بحلم معقوله بابا امبارح كان في فرحي والنهاردة منلاقيهوش معانا..

اليوم عدا وهما ماشيين لقيت حماتي جايه تقولي

_ يلا يا وفاء عشان تروحي بيتك

_ لا انا هبات هنا مع ماما عشان العزا بكرة

_ لا ابقي تعالي بكرة معندناش بنات تبات برة بيتها

_ مهو دا بيتي كمان وبعدين هو حضرتك شايفه ان وقته الكلام دا

لقيت ماما اتدخلت فالكلام وقالتلي روحي وتعالي بكرة

روحت معاهم وانا مش طيقاهم ولا طايقه نفسي...

واحنا راجعين لقيت حماتي بتقولي...

_ اعملي حسابك ان بكرة برضوا مفيش بيات برة البيت ....

بصيتلها ومردتش عليها خالص كنت في وادي تاني...

عدا تاني يوم العزا خلص وروحت معاهم فعلا عشان مفيش فيا دماغ للمشاكل....

بس الي استغربتله اني لقيتها تاني يوم ب كل بجاحه بتفتح باب الشقه وبتدخل عليا اوضه نومي تصحيني...

قومت من النوم مفزوعه ....

_ ايه دا انتي نايمه بهدومك السوده...

_ ايوة انا حرة وبعدين هو انتي ازاي تدخلي كده عليا...

_ ياعيني عليك ياعصام ياحبيبي مراتك من تاني يوم جواز لبسالك الاسود ....

يلا ياحلوه عشان تجهزي الفطار مع سلايفك مش كل يوم هاجي اصحيكي واعملي حسابك من الساعه ٥ الصبح كل يوم الاقيكي تحت عندي....

_ ليه ان شاء الله اصحي من ٥ الفجر كل يوم دنا لو خدامه مش هصحي ٥ الفجر

_ هو دا اسلوبنا عاجبك اهلا وسهلا مش عاجبك الباب يفوت جمل

قعدت افكر بجديه في موضوع الطلاق بس فالوقت الحالي صعب عشان موت والدي ....
وامي لسه مصدومه اروح كمان اقولها ان انا هتطلق دي تموت فيها...

قررت ان انا هستسلم للامر الواقع واشوف هعمل ايه....

نزلت تحت عند سلايفي وكانت اخته العقربة تحت عماله تزعقلهم ...

كل الي جه في بالي ..

ازاي البت دي متجوزتش لغاية دلوقتي اكيد وراها سر او مصيبه وانا هفضل وراها لحد ما اعرفه وساعتها اكسر عنيها بيه ومتجيش جنبي تاني

خلاص انا قررت اراقبها واشوفها ماسكه التليفون علي طول تكلم مين فالبلكونه ....

وانا واقفه لقيتها بتقولي اعمليلي فنجان قهوة ولا عاوزه تاخدي علقه محترمه تاني ....

دخلت اعمل القهوة ودخلتهولها البلكونه وانا خارجه سمعتها بتكلم حد وبتضحك اوي فالتليفون قولت اقف اسمعها بتكلم مين والي حسبته فعلا لقيته...

اتصدمت من الي سمعته ومبقتش مصدقه وداني

يتبع 



وضع القراءة :
حجم الخط
+
16
-
تباعد السطور
+
2
-