بنت من الجن الجزء الثالث بقلم نهي الشيخ

بنت من الجن

_ قبل ما اخرج من المؤسسه طلبت من المدير اني ادخل اشوف زينه
= وشفتها فعلا يا استاذ اسلام
_ اه بس للاسف اقدر اقولك ان حالتها مختلفه تماما عن حاله الطفله اللي كتبت عنها المقاله
= يعني زينه مش مريضه نفسيا
_ تفتكري يا استاذه ايمان في طفلة مهما كانت قوتها تقدر تشيل حد وتحدفه بكل قوه زي ما عملت معاكي كده
= تقصد ايه انا مش فاهمه
_ زينه دي مش ممكن تكون طفله عاديه
= يعني ممكن تكون ملبوسه فعلا...
_ او انها متكنش من بني ادم خالص...
= كلام حضرتك ده خلاني في حيره اكبر 
_ بصي انا اعرف دكتور في الازهر وعامل دكتوراه في موضوع المس من الجن ده ممكن يفيدنا في تشخيص حاله زينه 

خرجت من المستشفى واخدت اجازه يومين لحد ما اقدر ارجع الشغل واواجه زينه مره تانيه...... 

انا لازم احاول انقذ البنت دي لو فعلا في مخلوق خفي مسيطر عليها سواء كان جن او حتي شيطان انا مش هسيبه يقتلها او يخليها تقتل حد... 

تلفوني رن وانا بفكر يا تري هقدر اعمل ايه وهساعد زينه ازاي...

_ الو... مين معايا 

= انا اسلام اللي كنت عند حضرتك في المستشفي انتي نسيتي اني اخدت  تلفونك واتفقت اني هتصل بيكي 

_" اهلا اهلا.... معلش انا اسفه  جدااا  انا نسيت اسجل رقم حضرتك  فعلا

= تمام ولا يهمك... انا بكلمك لاني اتفقت مع الدكتور عطيه الشحات انه يجي يشوف زينه ويحاول يعالجها 

_ تمام جداا هو ممكن يجي امتي؟ 

= بكره لو ده مناسب ليكي... 

_ الحقيقه انا واخده اجازه من الشغل لاني لسه تعبانه شويه وهرجع باذن الله السبت 

= خلاص ان شاء الله هكلم الشيخ ونتقابل في المؤسسه يوم السبت بعد صلاه الظهر 
_ ان شاء الله 

قفلت المكالمه وفضلت الافكار تدور في راسي وكأن حياتي كلها بقت موضوع زينه وبس.... 

جه يوم السبت واول ما وصلت المؤسسه لقيت كارثه..... 
عم حسين الفراش قالي ان زينه كانت هتموت اربع اولاد دخلوا عندها الاوضه والمدير مصمم يمشيها من المؤسسه خالص 
لقيت نفسي بروح اوضه المدير وانا في قمه غضبي 

_ أستاذ مدبولي ممكن حضرتك تقولي انت عاوز تودي زينه فين

= البنت دي خطر يا استاذه... ده انت مفروض اول واحده تطلبي انها تمشي من هنا 

_ انا متاكده انها مريضه ومحتاجه مساعده 

= دي كانت هتموت اربع اولاد... مريضه ايه بس

_ وهما داخلوا ازاي عندها ده اهمال من الاشراف يا فندم 

=  ده قرار نهائي... البنت دي خطر ولازم تمشي من هنا 

_ ارجوك يا استاذ مدبولي اديني فرصه احاول اساعدها.. شهر واحد بس.... ارجوك
 
= شهر كتير يا استاذة.... هما عشر ايام بس لو مافيش تحسن واضح  في حالتها انا هنقلها لقسم الحالات الخطره في مستشفي الامراض العقليه 

طلعت من عنده وانا في قمه الحزن... لو ما نجحتش  محاوله استاذ اسلام والشيخ عطيه زينه هتضيع.... 

ولما استاذ اسلام جه هو والشيخ عطيه دخلنا علي زينه احنا التلاته وزينه كانت قاعده لوحدها بتبص من ورا ازاز الشباك 
والمره دي زينه كانت في  حاله طبيعيه خالص لما ناديت عليها  لفت وابتسمتلي ومسحت دموعها من عنيها..... كانت بتبكي وهي بتبص علي الاولاد بيلعبوا تحت.... 
خطفت قلبي والله وحسيت اني مسؤله عنها كان نفسي اخدها في حضني واهرب بيها...... 

اسلام طلب من الشيخ انه يبدأ بالكلام معاها وبعد نص ساعه كلام لقيته بيبصلنا ويقول انا شايف انها طبيعيه جدااا ومافيهاش اي حاجه... 
وفجأه وقف ولف حوالين زينه وقعد يبص  علي الحيطه كأنه بيدور علي حاجه 
وبعدها حط ايديه علي راس زينه وقعد يقرأ قران ويقول ادعيه كتير وانا واسلام عنينا متشلتش من علي زينه وكأننا مستنين حاجه تحصل.... 
وفعلا فجأه حصل حاجه غيرت حياتي كلها....... 
يتبع

استنونا فالجزء الرابع




وضع القراءة :
حجم الخط
+
16
-
تباعد السطور
+
2
-