بنت من الجن الجزء الرابع والاخير بقلم نهي الشيخ

بنت من الجن

لقيت زينه لونها اتغير وعنيها كأن طالع منها نار.... وابتدت تتكلم  بصوت غير مفهوم....

وفجأه لقيت نفسي كأني في حته تانيه  اسلام والشيخ اختفوا وزينه كمان....
لقيت نفسي في مكان ضلمه  ومش شايفه اي حاجه سمعت صوت بيكلمني.... نفس الصوت اللي كان بيطلع من زينه لما بتتغير.....
_ كلهم هيموتوا..... كلهم  هيموتوا
= انا فين.... ومين اللي بيتكلم...
_ لو مسمعتيش الكلام..... كلهم هيموتوا
= طب هما فين؟ "!!!!  اسلام والشيخ وزينه... فين؟؟؟ 
_ لو مسمعتيش الكلام... هيموتوا 

من كتر الخوف ماقدرتش انطق اي كلمه تانيه فضلت مستنيه اللي انا فيه ده يخلص وكأني في كابوس ومستنيه اصحي  باي شكل من النوم.... 

والصوت فضل يكلمني وقالي انه هيسيب زينه في حالها وهيرجعلي فتحي راكع واني لما ارجعله هخلف ولد هيغير العالم كله والمطلوب مني حاجه واحده بس..... 

وبعد ماخلص كلامه لقيت نفسي في الاوضه والشيخ حاطط ايده علي راسي انا وعمال يقرأ قران 

بصيت حواليا لقيت زينه قاعده علي جنب وبتعيط وجسمها كله  بيتنفض....
_ هو ايه اللي حصل...... 
= بعد ما الشيخ بدأ يقرأ قران علي زينه لقيناكي فجأه بتسرخي واغمي عليكي بس كنتي كأنك بتكلمي حد... 
_ انا كنت فعلا بكلم حد... 
= حد... حد مين؟
_ هعرفك كل حاجه يا استاذ اسلام بس انا محتاجه اقعد مع الشيخ عطيه لوحدنا..... انا اسفه 

فضل اسلام مع زينه وانا والشيخ رحنا قعدنا في المكتب بتاعي
وحكتله علي الي حصل.. 
_ وايه الشرط اللي طلبه منك يا بنتي..  
= اني اتخلي عن اسمي.. ولما قلتله تقصد اني اغير اسمي كرر اكتر من مره اني اتخلي عن اسمي... 
_ انتي عارفه يعني ايه الكلام ده يا بنتي 
= لا مش عارفه.... هو يقصد ايه ومين ده اصلا 
_ عاوزك تتخلي عن ايمانك بربنا.....اوعي تصدقي وعود الشر ربنا هو الوهاب 
= طب ما انا ممكن اضحك عليه الايمان في القلب.. 
_ ما تلعبيش بالنار يا بنتي.. ابعدي عن الشر قلب الانسان مش في ايده... 
= انا عمري ما هفقد ايماني بربنا بس هو قالي انه هيرجعلي جوزي وهخلف... و...
_ اوعي تصدقي ... لا يعلم الغيب الا الله ده حلم ابليس يا بنتي انه يغوي بني ادم ويخليه يكفر بقدره ويهرب من مصيره ولما يصدقه يلاقي نفسه هرب من الجنه ونزل النار.. 
= انت مش عارف انا اتعذبت قد ايه ونفسي ازاي اكون ام 
_ ومن يتق الله يجعل له مخرجا يا بنتي... 
= بس ده قالي اني لو رفضت كلكم هتموتوا 
_ خدي يا بنتي... 
= ايه ده؟؟ 
_ ده دعاء مكتوب صلي النهارده ركعتين واقريه بقلبك ونامي وان شاء الله هتشوفي رؤيه باذن الله هتنورلك طريقك 

روحت البيت وانا حاسه اني في دوامه ملهاش نهايه.... كان كل  هدفي اني انقذ زينه لقيت نفسي في موضوع مش عارفه اوله من اخره 

صليت ودعيت كتير واخر كلمه قلتها قبل ما انام اللهم ارني الحق حقا وارزقني اتباعه وارني الباطل باطلا وارزقني اجتنابه 
نمت وشفت رؤيه غريبه 

شفت نفسي في شقتي القديمه وفتحي داخل عليا وماسكه ولد صغير في لفه مديت اديا وخدته منه وببص فيه لقيته مسخ   وله عين  واحده رميته من اديا وصحيت وانا بصرخ وبقول لا اله الا الله.... 

قمت بسرعه ولبست هدومي واتصلت باسلام وحكتله علي كل اللي  حصل.... 
_ ايمان انتي بتفكري في ايه بالضبط؟؟ 
= انا عاوزه انقذ زينه... وبس 
_ احنا لازم نتحد كلنا وندرس الموقف ونشوف ازاي ممكن ننقذ زينه من غير ما تقدمي اي تنازلات 
= مخبيش عليك صحيح انا اتهزيت لما حسيت اني  ممكن  اكون ام في يوم من الايام بس فقت من كلام الشيخ وايقنت ان كل شىء بقدر ربنا....
_ من ترك شىء لله عوضه الله خير منه 


اتفقت انا واسلام اننا هنروح نقابل الشيخ وهنتفق نعمل ايه وازاي ممكن ننقذ زينه  
والشيخ كلم اكتر من زميل ليه يجوا يحضروا الجلسه الاخيره اللي هيكون فيها حلقه زكر ورقيه شرعيه والشيخ قالي اني لازم احضر الجلسة مع زينه لاني مستهدفه انا كمان... 

وفعلا استمرت الجلسه اكتر من ٦ ساعات والحمد لله قدرنا ننتصر علي المخلوق المسيطر علي زينه بس للاسف بعد ما طلع  منها زينه دخلت في غيبوبه ونقلناها المستشفي جسمها الصغير الضعيف اتاثر بكل اللي حصل ده 
اخدت اجازه من الشغل وفضلت معاها مسبتهاش ولا ثانيه..... 
اسلام كان بيجي كل يوم يشوفنا ويطمن علينا واتقربنا من بعض جدااا 
وعرفت انه كان متجوز وانفصل لانه مش بيخلف... حسيت ساعتها ان ربنا بيقربنا من بعض لحكمه معينه 
زينه خرجت من المستشفي وهي مسكاني في اديها واسلام في اديها التانيه 

تمت

لمتابعة قصص وروايات اخري من هنا




وضع القراءة :
حجم الخط
+
16
-
تباعد السطور
+
2
-